KNULPAS

Hermann Hesse

Šis gruožinis literatūras kurinys yr sudaryts iš trijū istuorijas ciklu api laisva klajūna Knulpa, katras yr vaizdoujāms kap jautrus, poetiškas sielas žmuogus, besirenkontis gyvenima pagal šyrdi, o ne visuomenis taisyklis. Kurinys parašyts 1915 metās, tačiau paliestas temas aktualias i šiuom dėinuom, kor vis gvildenām kuokias yr ,,normalaus“ gyvenima nuormas.

A ,,normalus“ gyvenėms yr vienynteli teisynga fuorma gyventi?

Pagrindinis veikies Knulpas sąmoninga pasirēnk klajūna kelia, tep atsisakydams stabilaus darba, tortu i socialinia stātusa, katras siejāms su ,,normaliu“ gyvenimu. Tep knyga iškēl klausima: a laisvi verta socialinia stabiloma aukoujima? Juk būti kituokiu, jouda avim tarp baltū, neturietu būti patuogi i lėngva dalia. Knyguo ne kārta pavaizdoujama, kap aplynkinē nesupront i nesuvuok tuokia heruojaus gyvenima būda. Per sāva laisvoma uns dažnā atruoda nepatikėms, tačiau tai veikiejou ni muotās.

Už kitū nuomonis Knulpou daug svarbiau anuo vidėni laisvi, gyvenėms pagal prigymti, net jei tas atneš skorda i kasdienybis neapibrėžtoma. Heruojaus giliūs dialuogūs su kitās veikiejēs dažnu atveju atsivēr vidėnis laisvis troškėms, katras nepriklausa nu socialiniu aplinkybiu i nuostatu. Megyndāms aplynkiniams paaiškynti savus pasirinkimus uns paruoda, ka renkās gyvenima, katram gāl būti pačiu savim, net jei tai reišk nesaugoma. Kol vėinym ,,normalus“ gyvenėms yr prisitaikėms pri sistemas, Knulpou ,,normalus“ gyvenėms yr vidėni laisvi, neįtakuojama visū galimū baimiu, kor vis labiau pažyst pats savi.

Per keliuonis į sāvis paieška?

Pagrindinis veikies yr pasirynkis klajuokia kēlia, kor sutynk įvairiausiu žmoniū, aplonka vis kitas žemis i tep tyrinie pasauli. Bet kikvėins žmogaus pasirinkėms tor prāsmi, Knulpas ne išimtis. Anuo keliuonis nier tik fizinis judiejėms, tai simbuolis, katras atspynd žmogaus vidėnis transformācijas kēlia. Per susitikimus su skirtyngās žmonėm, puokalbēs su anās, veikies reflektou sāva pasirinkimus, asmenini puokyti per ėlgus gyvenima metus.   

Hesse kuriniūs dažnā nauduo klajūna figūra kap dvasinia ėiškuotoja archetipa. Knulps per daugeli keliavima mētu patyri įvairiausis gyvenima situacijas, katruos reikalāva pasirinkimu i puokyčiu padariusiu anon tuokiu žmuogum, kuoks užbaigi sāva keliuonis. Tai pasakuojėms api tapatybis i gyvēnima kēlia paieška. Jei veikies būtu priiemis sprindėma gyventi ,,normalu“ gyvenima, vargu a būtom pavykėn rāsti atsakymus i klausimas api savi i vykstonti gyvenima.

Kor slyp gyvēnima prasmie?   

Daugelis kasdėin klausiniejām: kuoki yr gyvēnima prasmie? Tai klausėms katras kikvėinām žmuogou tor skirtynga atsakyma, o aktualus išleikt vos ne nuolatuos. Heruojus klajuoklies ne kārta gvildēna šion klausima, o ypač uns padažnieja einont link finiša tiesiuosis. Artiejont pri gyvēnima pabaiguos Knulpas vis susimastydava kor ta prasmie, a visi gyvēnima pasirinkimā bova teisyngi. Trijū istuoriju cėklas paruoda skirtynga kikvėina gyvenima tarpsnia prāsmi, kap ana kėta i ties kou užsitvėrtina.

Kuriny, per veikieja, autuorius viel uždoud skaitytojou klausima: a gyvēnima vertie matoujama vėin pasiekimās, a užtēnk pāčia buvėma pasauly? Heruojus prāsmi māti ne socialiniūs riemūs, kor visi gyvēn pagal priimtas nuormas, o paprasčiausiam būvimi pasaulia dalim. Anuo suvokimi visa tiesa slypieja paprastumi, o ne perdietam mėginimi įruodyti žmogaus vertoma.

Asmenėni išvada api knyga.

Nors kurinys yr labā trūmps, tačiau istuorijas esmie plati i gili. Rašytuos liet pamatinis žmogaus prasmies temas, katras aš sau uždoudu i šēs laikās. Pradžiuo pasakuojami gyvenima ciklā atruoda naivus, nerymti. Tačiau per ėlgus veikieju puokalbius, anū samprotavimus atsiskleid daug naudyngas i susimastyti vertončias informācijas.  

Iš mažū puslapiu pasisiemiau užtvėrtinima, ka visks slyp paprastumi, nes kou daugiau stėngamies išspausti, tou dažniau gaunās šnipšts. Maži dalykā žmuogu dāra laimynga, kuo pasekuo gyvenima prasmie pasidāra aiškēsni. Patėka skaityti diskusijas api pasirinkimus, stebieti kāp skirtyngi žmoniū gyvenimā gāl būti vėinuodā svarbus i reikšmyngi. Knyga užverčiau įsikviepusi platiesnia priėmėma i ramiesnia gyvēnima pamatyma.