SKURDO VAIKAS

Katriona O‘Sullivan

Kai kurėi žmuonis gymst pasauly, katram ateitis jau suplanouta i savaimi suprontama. O yr tokiū, katrėi nu pat mažū dėinū muokuos išgyventi i toliau šindėinas negalvuo. Skords dažnā aprašuoms skaičēs, tačiau retā kalbama api anon iš emuocinis posis. Nieks nenuor pamatyti realybis kap uns persikēl į žmogaus savivērti, kūna i gebėjima tikieti ateitim.

Airiu psichuologi, lektuori i rašytuoja pristāta sāva biografija, katra gimtuo šaly tāpa ,,Metų biografija“. Knyguo autuori atvirā pasakuo api sāvaja pinkiū asmenų šeima, tėvū priklausomybis i sunkumus, su katrās vāks susidor augdāms nepritekliou. Tai tomsi realybi į katron mažā kas nuor pažvelgti i tou labiau padieti. Autuori be užuolonku gvildēn svarbis socialinis temas, o aš pasistengsu nušvėisti kon rāsi knygas puslapiūs.

Kuoki yr vaikysti priklausomybiu šeimuo?

Autuori užauga šeimuo kor abu tėva bova priklausuomi nu alkohuoliaus i narkuotiku. Svaiginimasis bova svarbiau už bet kuoki saugoma numūs. Užaugusi visiškuo nepriežiūruo Katriona O‘Sullivan knyguo dalinās prisiminimās, katrūs nebova emuocinia saugoma. Tėvū meili bova susipynusi su chauosu, kas kieli ne saugoma jausma, o nuolatini alki būti milimā i priimtā. Daugelis istuoriju skaudėna, nes beskaitont atėja suvokėms, ka ta maža mergaiti turieja suaugti daug greičiau, nėi kiti aprūpinti vakā. Mergaiti, katra norieja būti vāku, turieja tāpti suaugusia tam, ka išgyventu.

Per onksti suaugus i už savi pilnā atsakonti mergaiti išmuoka, per praktika, būti nuolatuos budiejima rėžimi i visada skaityti kitū žmoniū nuotaikas, ypač tėvū. Tai leisdava nuspieti būsima įvykiū scenariju i kap baigsēs dėina. Pasakuojimūs lėngva ižvelgti, ka kasdėina bova tisiuog išgyvenima rėžėms i nuolatinis stebiejėms, o kas bus toliau. Autuori labā gerā atskleidi, ka tuoks gyvenėms, katras iš pėrma skaitytojou atruoda visiška nenormalus, anai bova nuorma i natūrali aplynka. Skorda persmelkti numā atstuoja komfuorta zuona, katruo išmuoka gyventi.

Skords, tai emuocini būsena a pinigū stygius?

Nors daugelis šion knyga skaitončiu teigtu, ka skords yr pinigū stygiaus padarinys, tačiau Katriona per pateiktus prisiminimus apšvėit kėta skorda posi. Anuos akimis skords bova gyvenima būds, tėvū pasirinkėms pinigus išleisti kitor, ne šeimuos geruovē. Nors autorē trūka maista, rūbu a higienas priemuoniu, tačiau vidinis, emuocinis skords bova daug stipriesnis. Per tėvū neatsakingoma jauna mergaiti bova privērsta gyventi saugoma, ateitėis planavima i savivērtis stygiou. Toks nuolatinis trūkoms iššauki chauosa i išgyvenima rėžėma anuos psicholuoginie būsenuo.

Žmuonis iš stabiliū šeimū ne iki gāla supront, kėik daug energijas išeikvuo tėi, katrėi kasdėina megėn išgyventi. Rašytuoja knygo vis prieidava pri megėnima paaiškynti kap sunku yr patikieti savim, kap esi skorda dugni. Nuolatėni gieda dėl sāva šeimuos iškreip puožiūri į savi, sumėnkyndama i uždarydama duris į geriesni rytuoju. Išeiti iš psicholuoginia skorda yr daug sunkiau nėi uždėrbti pinigus, katrėi leistu nusipėrkti trūkstamū daiktū. Knygas autuori skyri daug laika mėgyndama nupiešti realu vaizda api skorda įsiurbėma į liūna i kėik daug nežmuonišku pastungū reik, ka nors biški nu anuo nutuolti tam, ka galietum pagaliau pradieti laisvā kvepouti.

Išsilavinėms kaip išsigelbijėms?

Katriona O‘Sullivan išlėpti iš skorda liūna padieja vienynteli anuos aistra i saugus kampielis – muokslas. Nu pat mažens miega skaityti knygas i domietėis naujuom žiniuom, nes tai bova vienynteli, anuos pačiuos kontrolioujama veikla. Tačiau, vis mažiau gaunont palaikyma i paskatinima iš aplinkuos ta veikla po mažu sumėnka. Autuori aprāši tipini antisocialiū žmoniū būda, kumet destrukcini aplynka smogda vėins kėta žemyn, vėituo skatinima i padėjėma išeiti iš degradācijas.

Šiuo knyguo autuori nesukūri sekmies istuorijas, kor nu nuliaus greitā pakėla į siekmi. Nors šiou metu muoteris yr sėkmyngā baigusi aukštus muokslus, tor gēra išsilavinima, tačiau vis dar kovuo su sāva vidiniu kritiku, katras anā neleid jaustėis vertā tarp sėkmyngu asmenū. Anuos socialinis pakilėms turieja nežmuoniškā sunki kaina. Skaitont api psichuologis studiju laikuotarpi būdava vėitu, kor jau galvuojau visks, ana neatsistuos unt kuoju. Dieka gerū žmoniū, katrėi māti anuos potenciala, mažās žingsnelēs išlėpa iš priklausomybiu i savidestrukcijas doubies. Tai paruoda svarbu dalyka, ka žmonym turintym priklausomybiu yr labā svarbus tynkāms palaikėms, nes savū jėgū visada per mažā.

Knyga muona akimis.

Šion knyga suskaičiau laba greitā kas muon, iš tiesū, nebūdinga. Kikvėins puslapis sliepi daug skausma, joudū patyrimu i išgyvenimu. Nesaugoma jausmas persmelkis visus sakinius, bet istuorija vistėik trauki pasilėkti i sekti kas bus toliau. Tai laba atvėrs pasakuojėms, kor autuori turieja sutelkti vėsa drāsa, nes či ne vėin tik atpasakuojėms, bet i per nauja išgyvenamas traumas, katras daugelis nuor užmėršti i ištrynti. Žaviejaus anuos atkaklumu, katras pasiruodydava didžiausiam dugni.

Istuorija nebova pasakuojama iš aukuos posis. Kap tik, autuoris pozicija bova tvėrta i nekaltinonti. Su drasa žiūriedama į gyvenima, knygas stiliu pasirynka tvėrta su savu žarguonu, katras atspindieja tometėni nuotaika. Tai biografija, katruo netrūkst judesia, samyšia i brutaloma. Visiškā nesuvaidynta realybi dažnu atveju atruodydava lyg filma takielis, kor scena baigses su visu esamu samyšiu. 

Perskaičius knyga susimasčiau, kėik daug pasauly yr tokiū kap Katriona O‘Sullivan. Džiaugūs už tus, kam pavyka pakeisti sāva gyvenima. Bet stiprē atjautu tus, katrėi nesugebieja išlėpti iš moralinia skorda, nes aplynka per daug stiprē trauki į savi, o truokštāms pasaulis giedina prigymti. Ši knyga nier vėin biografinis pasakuojėms api mergaiti. Muona akimis, tai paakuojėms api sunkoma patikieti savim i drāsa mėginimi išgyventi i keistėis.