RADIKALUS PRIĖMIMAS

Tara Brach

Dauguma mūsu gyvenām tylē tikiedami, ka su mumis kažkas negerā. A dažnā jautys pervargis, įspraust į perfekcionizma riemus, ėiškontis pabėgėma nu nerima i baimiu? O gal šyrdi spaud didelis skausmas, tik nežinā iš kor uns i api kon? Autuori Tara Brach sāva knyguo tau išsamē atsakys į visus klausimus susijusius su nuogastavimu i pateiks meditaciniu pavyzdžiū kap iš tuo išeiti. 

KŪNA I EMUOCIJU RIŠYS

Meditāciju muokytuoja, psichuologi i knygu autuori tor sukaupusi daug žiniū api emuocijas i anū puoveiki mūsu kūnou. Knyguo ,,Radikalus priėmimas“ autuori diemesi sutelki į emuocijas i anū pasireiškėma kūni per fizini skausma a įtampa. Kap pati teig puslapiūs, mūsu kūns yr nuostabus sutvėrėms, katras paruoda kas išgyvēnama anuo vidou, tik reik mums suprāsti i priimti ton jausma, o ne išsigondus ignorouti.

A kada esi pats pastebiejis kuokis emuocijas gyvēn pas tavi? O gal pajautis tam tėkra vėita, katruo glūd neįvardynts sunkoms? Pasak Taras Brach, mūsu emuocinē išgyvenimā gāl ,,nugolti“ įvairiuos kūna vėituos, tokiuos kap: krutėni, pečē, pėlvs, nogara, muoteryms gymda i daugely kitū vėitu. Tam, ka išsilaisvintumiem turēm suprāsti dėl kuo skausmas atsirāda i radikalē anon priimti. Tai nier lėngvas darbs, bet autuori drosinončē puslapiūs pāded pro ton praeiti pasitelkus meditaciju įvairuovi i emuociju paleidėma metuoda.

KAS YR ,,R.A.I.N.“ METUODS?

Daugelis esām nesamoningā įpratėn biegti nu patiriamū jausmū, ypač katrėi skaudėn, sukēl sunkoma i pasimetėma. Tai suprontama, nes nikada nier patuogu būti nepatogumi. Mūsu kūns i myntis nuor josti saugoma i laimingoma, katruo sėikām kikvėina akimirka, tačiau kou labiau biegām, tou giliau įstryngām blogam jausmi. Be radikalaus jausmū priėmėma mes sunkē rasēm tyra i nesuvaidynta pilnātvi, katruo galiesēm būti savim. Autuori tor radikalaus priėmėma technika, katron pavadėna ,,R.A.I.N.“ metuodu i anou dalijās šiuo knyguo.

Kap pati Tara išaiškina ,,R.A.I.N.“ metuods yr: Recognize (atpažinti); Allow (leisti būti); Investigate (tyrinėti); Nurture (globoti). Skaitydama šion knyga, ne kārta meginau pati sau anon pritaikyti sudėtynguos a lingvuos situacijuos. Iš pėrma sekdavuos kebluokā, tačiau vis dažniau praktikoujynt, pajutau kap nurymstu i nebepergalvuoju vis iš nauja scenariju katrėi kunkėn. Psichuologi šion emuociju valdyma metuoda pateiki pasitelkusi įvairiausis žmoniū istuorijas, leisdama skaitytojou įvairiau pažynti praktika i kartu išmuokti sąmoningā savi stebieti.

KUDIE SVARBUS SĄMONINGOMS?

Manau, ka visuos knygas stubors už katruo laikies temas – sąmoningoms. Nepasitelkus anuo negalietumiem suprāsti kūna ryšiaus su emocijuom i jou labiau praktikouti ,,R.A.I.N.“ metuoda. Būti sąmoningu nier lėngva, tai kainou daug jėgū i drąsuos priimont tėkra, nesuvaidynta savi. Tačiau, šis gebiejėms suteikt realybi katruo galēm gyventi be bėgėma nu pāčia sāvis. Galimybi sustuoti i būti su tou kas vykst mumys, priimont i doudont tam erdvies, yr slapts rakts i laimi. Tara Brach dažnā pabrieždava, ka sugebont pasitelkti sąmoningoma mes sugebiesēm išsprėsti visas mus kamoujončias problemas.

Būnont sąmoningumi mes juokiu būdu nebiegām nu problemu, o nustuojēm su anuom kovuoti. Kovuojėms gāl pasireikšti per nuolatini pergalvuojima, ignorāvima, megėnima ištrynti jausma pasitelkont darbus, miegstamas veiklas, kitus žmuonis a net priklausomybis. O nustuojus kovuoti, mes pradedām daryti puokyti katras, pasak psichuologis, yr pėrms žyngsnis į lingviesni gyvēnima be kančiuos. Per sąmoningoma i anuo vēdinas praktikas, mes pagaliau tampām draugā su pačiu savim i paleidām bovusi prieša, katras vis stumdava į baimi, stresa, nerima i bejėgysti.

KNYGA MUONA AKIMIS

Kuris laiks buvau pasigēdusi populiariuosis psicholuogijas knygu, katruos parašytas ,,paprasta žmoniū kalba“ i nagrinie kikvėinam svarbias šindėin temas. Tarp pervargima, pasimetėma, baimiu a sunkumu nuorās pagalbas ronkas, katra paruodytu kēlia link pilnātvis, be nuogastāvima. Skaitont ,,Radikalus priėmimas“ džiaugiaus kikvėinu puslapiu i noriejau visym šaukti: „pagaliau či ta knyga, katruos jau labā ilgiejaus!“.

Tai nier vėin psicholuogini knyga, nes anuo daug dvasingoma, katras puikē dēr pri muoksla. Tiku ka stėngontėis tāpti sąmonyngu žmogum, turēm savi pažynti per įvairiausis pusis, o ši knyga ton tik įruodi pasitelkusi daugiausia budizma, juogas sampratas i psicholuoginis žinias. Patėka, ka autuori leida suprāsti, jog gyvenima mes nesustabdysēm tam, ka pailsieti, tačiau su tinkamuom praktikuom galēm pri anuo prisitaikyti neeikvuojont sāvis. Išgėrdus, priiemus i pamegėnus praktikouti knyguo aprašytus pratimus, tiku ka mūsu siela i tou pačiu gyvenėms taps šveisiesnis i ramiesnis.