SKRYDIS VIRŠ GEGUTĖS LIZDO

Ken Kesey

Aprāšuoma knyga parašyta 1962 metās, kap psicholuogija tik pradieja pagauti pagreiti muoksli i visuomenie. Tai stiprus romāns, api katron kalbama net iki šiū dėinū, o fylms pastatyts pagal knyga, vis da užēm top pozicija, tarp žiūrimiausiu fylmu. Nerkem plačiau į knygas vėdu.

Kap knyguo pateikiama psichikas samprata?

Žmuonis, katrėi tor psichikas sutrikimus socialinie sistemuo vis dā yr gan nepatuogus. Nors daugelis teig i aiškėn, ka vis kuriamas sistemas anus adaptouti, tačiau tiesa yr kita, o kyga anon atskleid be varga. Autuorius puslapiūs kel klausima kas yr ,,nuorma, o kas jau ,,beprotybi“. Iš veikieju dialuoga dažnu atveju atruoda, ka šnek pilnā sveiki žmuonis, be jokių psichikas problemu, tačiau anėi vis dėl tuo uždaryti psichiatrijas skyriou.

Daugelis knygas veikieju sistemā yr nepavojyngi, kap savi įvardėn, ,,kiške“, katrėi stėngās būti nepastebieti vėlka. Per laika patyri, ka vėlks baud už neklosnu elgesi, šiou metu bausmis vykst pasitelkus elektrošuoka a net lobotuomija. Ton patyris pacients retu atveju mėgyns prasižėngti i tou labiau būti nepatuogus. Dėl tuo kėlst klausėms, kėi iš tėkra megėna adaptouti liguoni pri pasaulia, o kėik papraščiausē gydi paklusnoma vedini.

A galia i valdžia naikėn žmogaus prigymti?   

Knyguo kikvėins veikies tor sāva vaidmeni, katras atspynd socialini sraigta. Skaitydama vis stebiejaus, kap visuos sferuos galiausē pasireišk gālias hierarchija, net psichiatrijas cėntri. Žmuonis katrėi sėik valdžiuos, anuos sėiks visor, o pasėikėn nenories paleisti, ypač kap vėina iš pagrindiniu veikieju – sesusi Ratched. Anā priklausi vėsas skyrius, net i pats skyriaus daktārs.

Tai sėina katra nepastumama, autoritarizmas priš katron visi bėja priešintėis. Sesuti bova vėlks priš katron paklosa visi skyriaus kiškē. Sāva manipuliacijuom, žiaurumu i psicholuoginēs žaidimās tik dā labiau slopėna liguoniu žmogiškoma. Pagrindinis veikies McMurphy visuom išgaliem megėna priešintėis laisvis vedāms, per vėsa istuorija išmegėna daug būdu kasdėinā praskaidrinti, tačiau galiausē tēka liūdnē nusileisti. Ne visks yr nugalima i žmogaus prigymtis po mažu, pasitelkus gālia, nykst tarp keturiū sėinu.  

O gal bendruomini gāl kartu nugalieti?

Vikrus i pralaimieti nemiegstontis McMurphy atvykis į psichiatrijas skyriu iškārta nuskanāva esama situacija tarp sesutis i liguoniu. Miegstontis laisvi nenorieja anuos paleisti, tačiau Ratched taisyklis visiškā skelb kitkon. Tad či prasidieja kuova tarp laisvis i valdžiuos. Per situacijas, katruos tikrina ribas. Planus, katrėi išmošdava iš viežiu, jauns vyrs sugebieja kityms liguoniams įpūsti tep senē išbliesusi givybi.  

Knyguo pavaizdouts maištavėms padieja veikiejāms atgauti žmogiškoma, laisvis noriejima. Per įvairias situacijas liguonē pradieja pasitikieti savim suprasdami, ka senu seniausē bova pasveikėn, tik reikieja atsibosti iš hipnotizoujančia sapna. Pagaliau daugelis iš kiškiu tāpa sveikās žmonim, katrėi galieja grįžti į realius gyvenimus. Tačiau jei ne bendroms, jėgū sutelkėms vėins į kėta, tai vargu a būtu pavykėn kada prasimerkti.

Išvada.

Vertont kikvėina puslapi akim, sekont istuorija, aiškē supratau kudie iki šiū dėinū ši knyga yr aukštumuos. Kikvėina veikieju charektiristika atspynd tam tikras socialinis problemas: māžumas, diskriminācija, nuteisėma, nepriėmėma i t.t. Socialinis temas visās laikās išlėikt aktualis i daugelia aptariniejamas. Romani anuos skleidies kap gėliū žeidā. Knyga verta visū pagirū i diskusiju, katruos vis dā skrie į autoriaus posi, nes tai kurinys, katras netor seniejima termina.