KODĖL MES NEMIEGAME?

Darian Leader

Kas karta prabodusi naktimis i bandydama skaičiouti avis lubuos, ka užmėgti, vis nervyngā galvuoju: nu kudie aš nemėigtu? Gi nier per karšta, priš mėiga skaičiau knyga, o ne į telefuona ekrāna veiziejau. Atruoda padariau vėsa mėiga higiena, bet smēgenis vistėik neatsijūng išsivalimou.

Traumu įtaka mėigou.

Autuorius yr praktikoujontis psichoanalitiks, Freudo analizis ir tyrimu cėntra narys. Žmuogus katras sāva darba metu gilinās i žmoniū patėrtas traumas i anū pādarinius mėiga atžvilgiu. Knyguo rāša api kikvėina sukaupta, neišjausta i nepaleista trauma, katra lėikt mūsu kūni i pasamonie, kuo pasekuo dėl anuos nesąmoningā bijuom užgėgti. Mūms gāli atruodyti, ka užmerkus akis mes viel viskon patėrsēm.

Tačiau traumas, nors i gan didelis mėiga trukdytuojas, bet ne vienyntelis. Mūsu mėiga įtakuo įvairiausi faktorē, api katrus autuorius dalinās knyguo su pavyzdžēs, nebijuodāms pateikti net kai kuriū tyrimu netiksloma. Vėin gera i stiprē populiarinama mėiga higiena neišsprės esamuos problemas.

O gal iš tiesū nier juokia mėiga sutrikėma?

Darian Leader knyga pradieja nu šiū dėinū populiaria trėnda ,,paruodykēm vartuotojou, ka uns tor sutrikėma i doukēm anām vaista viskām išgyditi“ atskleidimu. Esama rynka yr perpidyta pasiūluos, dėl tuo kompanijas dažnā nauduo triukus su mėiga sutrikimu i siūla vartuotojou daiktus, katrėi neva ,,pagyda“ lėga. Autuorius atskleid visus triukus i paneig anū nauda, nes nier tuokia daikta, katras išgyditu tikrus mėiga sutrikėma simptuomus.

Bet čia psichoanalitiks pateik kėta klausima: o kas iš tiesū yr mėiga sutrikėms? Knyguo nepabėja paminieti kitū daktarū nekompetitiškoma ties vaistū skyrimu be reikala, mėiga sutrikėma nustātyma atžagaria ronka, net nepasigilinus ar tai tikra kent atėjusiām pacientou. Mūsu mėiga ciklas per daug omžiu yr stiprē pasikeitis dėl socialiniu aplinkybiu i kai kurėi daktarā nustāta sutrikimus ne pagal žmogaus būsena, o pagal socialē priimtas nuormas.

Kėik unkstėi gāli pradieti vystitėis mėiga sutrikėms?

Pasak autoriaus, suaugusia žmogaus mėiga sutrikėms jau gali pradieti vystitėis unkstivuo kudikystie. Tėvā neatleipė kūdikia puoreikiu, disfunkcini šeima jaunystie, sudėtyngi santikē suaugus – vėsas tas įtakuo mėiga sutrikimus. Kudikysti i vaikysti tou klausimu ypač aktuali i svārbi. 

Autuorius knyguo daug diemesia skyri vaikystis aspektāms, kor atsirond tėvū klaidas i kuoks nekalts elgesys gāli padaryti daug žaluos. Muon asmeniškā, kai kuriūs skyriūs bova per daug vaikystis i kudikystis temu. Noriejuos labiau sužinuoti kon galiu dabar padaryti su esama problema. Tačiau, gerā pagalvuojus, kāp sprėsi problema, jei nežinā iš kor i kāp ana atsirāda.

Išvada.

Knyga muon patėka drasa paruodont netuobula gydima sistema. Tai kas mums atruoda tor padieti, dažnu atveju gal dā labiau pakėnkti. O marketinga rynka tou nauduojēs i sėik apgauti vartuotoja. Gyvenām klastyngās laikās, dėl tuo tuokias knygas pāded atsieti pelus nu grudū.

Skaities lingvā, autuorius nevartuoja sudėtyngu sampratu a specifiniu žuodžiu skirtū medicinā. Kap tik pateiki viskon lingvā i aiškē suprontamā, tik noriek pats išgėrsti. Aš stėngiaus išgėrsti i supratau, ka tėi prabudimā nākti dā nereišk, ka turu mėiga sutrikėma lėga. Tas stiprē nuramėna.