Verena Kast
Su aukuos vaidmeniu visi susidūrām. Tai pātis bunām aukuo, tai aplynkinē žmuonis bendraudami su mumis. Dažnu atveju būn lingviau kėta apkaltynti šiou epitetu, nėi į savi pažiūrieti. Kazdėinuo be gāla miegstām pasisvaidyti šiou žuodžiu, nors vargu a bin susimastuom, kėik reikšmies i jieguos uns neš.
Aukuos vaidmou iš arčiau.
Kap jau visi apsisvaidiem šiou žuodžiu, nusprėndžiau su anou susipažynti iš arčiau. Ši knyga padieja suprāsti plačiau api aukuos pozicija: iš kor ana atsirond, kon doud i kāp kynt. Autuori yr praktikoujonti C.G. Jung pakraipuos psichoanalitiki i žymiausi šiuos temas nagrinietuoji. Muona suvokimu, gerēsnis autuoris susipažynti su aukuos vaidmeniu negaliejau rāsti.
Perskaičius knyga atėja supratėms, ka tėi, katrėi mietuos šiou žuodžiu dažnu atveju pātis būn aukas, katruos vis kynt iš aukuos į agresuoriu. Pasiruoda, žmuogus neužēm vėinuos pozicijas, nes aukuom dažnā pasitaika, ka reik pereiti į agresuoriu kap pastarasis vaidmou nebeveik i trūkst gālis savi atstovieti.
Aukuos atsiradėms.
Knyga pėlna naudyngas informacijas. Pri jau sužinuotu fāktu, dā prisyded supratėms iš kor atsirond puolėms į aukuos pozicija. Užverčiau knyga žinuodama, ka tai įgaunama besimokinont išgyvenima muodeliu. Tai nier įgymta savybi, tai išmuokstama stebont kitus, išmėginont apsiginėma techniku a įgavus daug kuompleksu su katrās sunku susigyventi.
Visks išmuokstama vaikystie, kap prāded formoutėis mūsų asmenybi, elgesys i vaidmou suociumi. Autuori išsamē aprāša kāp veik baimis i pyktis įtakuodami aukuos tipus, neužmėršt dā paminieti agresoriaus, nes kap miniejau, tai svarbi aukuos vaidmens dalis.
Kam patiks knyga?
Ėlga laika noriejau perskaityti šion knyga i pagaliau ana pasėiki muona ronkas. Nesigailu laukusi tėik ilgā, gautas žėnis atliep anuos ėiškuojima nuovargi. Muon ana patėka informatyvumu, konkrečiu i strukturizoutu žiniū pateikimu. Leida ne tik pažvelgti į sąvuoka, bet i suprāsti anuos šaknis. Tiku ka patiks tam skaitytojou, katras duomās žmoniū elgesia muodelēs.
Leidėjas: ,,Dialogo kultūros institutas”
Leidimo metai: 2002
Puslapiai: 150
