ŽIEMOS MAUDYNĖS

Susanna Søberg

Besibaigont šaltym orāms i ateinont saulietām i šviežumu kvepunčiam pavasariou, mėginu spieti pristatyti knyga, katruo kalbama api šalčia terapija. Pasėikus šaltū maudyniu sezuona finiša tiesiaja, jau galēm pradieti mintym ruoštėis ateinončiam rudeniou. Vasara prabiegs greitā i ruoniu sezuons viel bus aktualus mūsu akiraty.

Kap šaltis įsiskverbi į kasdienybi?

Žinau, jog vėin kabieti api šalta vundeni jau kel drebuli. Priš metus pati buvau šalta vundens kritiki i žegnuojaus priš anon, ka tik negauti ni laša unt sāva oduos. Tačiau stiprē spjaudydama i vundeni atėjau į tuoki gyvēnima taška, kor tēka ton prispjaudyta vundini pačē gerti. Nier tuo bluoga, kas neįšeitu į gēra – šiou metu žinau abi rynga pusis.

Knygas autuori, turynti dāktara laipsni i nagriniejonti medžiagū apykaita, lygē tep pat priešinuos šalčiou, kol vėina dėina pajauti, ka tor su anou susidraugauti. Panašu, jog daugelia ruoniu prādžias yr veinuodas, nu baimis pereinama į dronsa. Nors muokslinynkis pradžia nebova lėngva, tačiau atneši daug nauduos į anuos gyvenima. Ne tik fizini i emuocini būsena pagerieja, bet i anuos gyvenims. Vedama maudyniu, darbinēs klausimas pasinieri į šalčia terapija, kuo pasekuo savo ronkuos turu šion knyga.

Kuoks pėrms įspūdis api knyga?

Tik atvertus pėrmus knygas puslapius gavau gēra patyrti. Visks kou autuori dalinās yr pateikta šiuolaikinēm žmuogou, katras daug dėrb, netor gausuos laisva laika i dažnu atveju pamėršt savūsius išgyvenima puoreikius (nekalbu api maista i mėiga). Knyga išdalynta mažās skyrēs, su atskiruom temuom i daug naudingas, paprastā aprašuomas informacijas api šalčia maudyniu praktikas.

Skaitydama knyga daugeli kartu pagalvuojau, ka būčiau noriejusi anon paimti į ronka i po biški skaityti kap tik pradiejau maudynis šaltam vundiny. Autuori po biški, padrasinont sklondže įved į šalčia baimi i išsklaida visus nuogastavimus katrėi apēm susidūrus su šalčiu. Su tuokiu Susannas drosinimu i faktu pateikimu, kikvėins iš mūsų laisvā įšuoktu į ledėni eketi.

Kas knyguo tėik stiprē drosėn?

Mes visada mažiau bijuom naujuoviu, kap žinuom kas lauk ateity. Kou visks smulkiau pateikta mūsu smegenym, tuo mažiau anuos panikou. Autuori žinuodama šion fākta pasirynka knyguo viskon išdiestyti iki mažiausiu informacijas kruopelyčiu. Perskaičius knyga beveik nelėikt klausimų api šalčia maudynis, nes apkalbama anuo nauda i žala, kap pradieti maudynis i kon tas doud organizmou.  

Iki smulkmenu išvardinama kas vykst mūsu kūni būnont šaltuos banguos i kėik anuos būti, ka organizmas nepatėrtu per didelia šuoka. Jūk kikvėina veikla, katra doud daug nauduos, elgontėis neapgalvuotā gali douti tėik pat žaluos. Api blogybis rašytuoja kalb be užuokonku i aiškē pateik kas gal negēra nutėkti, neužmėršdama paminieti kuokius simptuomus turintyms žmonyms pliuškentėis eketie uždrausta.

Kuoks paskutinis žuodis api knyga?

Kap i miniejau unkščiau, būčiau be gāla apsidžiaugus anon atradus sāva šaltū maudyniu pradžiuo. Ši knyga kap šalčia terapijas enciklopedija i pradžiamuoklis. Visks pateikta skrupulyngā, aiškē, su kelēs tyrimās katrėi jau atlikti šiuo temuo. Skaitont jautās autuoris sudieta visa širdis i torimas žėnias, katruos sukauptas vēdinas meili šalčia terapijē.

Perskaičius knyga aiškiau suvuoku kas vykst su muona organizmu būnont eketie, karts net meginu pagauti puojučius i nuspieti kuoks kūna pruocesas vykst. Tai gers įruodėms, ka perskaityta informacija užsilėka atminty i davi daug nauduos. Knygas suteiktas žinias nepraėja pro ausi i taikau anas ne tik sau, bet i įkalbiniedama draugus pliuškentėis kartu.