Išejėn iš džiaugsma i pasijutėn liudnē, įskaudynti, besiilgontis kažkuo, mes iš paskutiniūju stėngamies nepatuogius jausmus nustūmpti į šāli. Pabiegti apsimetont ka anū net neturēm.
Kažkatrou metu evoliucijuo įvyka klaida i liūdesys tāpa neigiama emuocija, katron slepām ne tik nu kitū, bet i pātis nu sāvis. Bijuodami šion jausma išjausti i biegdami visuom išgaliem kou toliau, dažnu atveju atsidurām perdegimi iš katruo pakėlti prireik visū jėgū. Klausėms kėlst, tai kam mes neigām liūdesi?
Autuori siūla susidraugauti su liūdesiu.
Susan Cain siūla nebiegti nu liūdnoma. Daug geriesnis pasirinkėms, atsisokus tėisē į anon pamatyti kuokis naudas gaunām išjautėn jausma. Kikvėina neapleista emuocija suteik mums ne tik ramybi, bet nauda pažinont savi i pasauli. Liudesys nier bluoga emuocija, sveikiau anon išjausti nėi ignorouti. Tačiau socialinis gyvenėms diktou visai kėta, mums nesveika, gyvenima būda, kor visor, kap Coca-Cola reklama per Kaliedas, vaidenās pozityvoma kults. Labiause uns paplėtis yr Amerikuo, kor žmuonis atruoda varžuos tarpusavy, katras yr linksmiausis. Tačiau kita tuo pozityvoma posi, ka ši šalis suvartuo didžiausi kieki antidepresantu. Tai tik įruoda, jog liūdesys nier priešas, nu katruo reik biegti.
Kon liūdesys mum suteik?
Kap autuori teig, liūdesys mums suteik dideli empatijas jausma kėta žmogaus atžvilgiu. Per sāva liūdesi mes pajautām kėta žmogaus liūdesi i tai mus suartėn. Kap knyguo pateikta tyrima išvada teig, tai be liūdesia mes negalietumiem skaityti kėta žmogaus mimiku, katruos išdoud liūdesi a susirūpinima. Vėsas šis skaitėms atsirond iš empatijas, katra pāded išgyventi.
Liudesys pāded kūrybuo, nes jautriau jūntām kikvėina nuorima išreikšti dalēli. O miegaujontėis kitū kūryba, subtiliau pamatuom a išgėrstam mažas detalis. Nebijont liūdesiaus, mes giliau įsileidām mena į savi, o pasak tyrimu, mens gyda žmogaus emuocijas. Apiemus depresiniou liūdesiou patartina žiūrieti į tapytus paveikslus, a klausytėis muzikas, tai leis lingviau išjausti visus melanchuolijas jausmus.
Kou knyga suduomina?
Šiuo knyguo daug infomacijas api liūdesi iš visū pusiu: meilis, netektėis, gedula, darba aplinkuos, pralaimiejima a laimiejima. Autuori surynka daug pavyzdžiū ne tik muoksliniu, bet i iš gyvenimišku dėinū. Kasdėinē, asmeniški pasidalinimā per istuorijas suteik artimoma šiū dėinū žmogaus kasdienybē, kor dažnu atveju užmėrštām kokėi iš tikrūju esām.
Nuoru tikieti, ka ši knyga padies nusimēsti perdieta pozityvoma kaukis i padies kikvėinām sau leisti būti liūdnu, o gal i melanchuolišku. Nes tai emuocijas, katruos mums doud didesnis įžvalgas.
Leidėjas: ,,Tobulėjimo projektai”
Leidimo metai: 2022
Puslapiai: 272
