Priš imont knyga į ronkas anā sukieliau daug lūkesčiu sāva galvuo. Iš anuos tikiejaus konkretaus paaiškinima tarp budizma i neuromuoksla. Konkrečēs faktās, nepėlstont iš kiaura kėbira į tošti, be ilgū litaniju i pāsakuojėmu. Tik gaila, perskaičius vyltis neatitėka rezultāta, nes visi lūkesčē bova sukorti muona galvuo, o ne apraši.
Taigi, kas tuo knyguo pasisliepėn?
Autuorius pasirynka aprašyti daug temu, katruos vos tėlpa turinį per kelis lapus. Beskaitont knyga, tarp tū visū temu aš pradiejau pasimetinieti net nepasėikus vėduria. Pradžiuo mislijau: gal esu per daug išsiblaškiusi šē knygā. Susikaupdavau priš kikvėina eiluti i jau puslapia pabaiguo skrajuodavau kažkor užmėršusi api kon skaitau.
Autuorius nu budizma monoluogu lek pri neuromuoksla aiškinima, kap laikrodžia švytuokli gerā užsukta. Tas labiause i blaška, nes neišein susikoncentruoti, ypač kap informacija tarp katrū bėgiuojam yr pateikta be gāla ištemtā. Viskon sukonkretinus, manau, knygas belėktu tik posi. Kas sakyčiau išeitu į nauda.
Pateiktuos informacijas giloms.
Nors parynktas temas atruoda įduomis i reikalyngas pasigilynti, bet visa informacija pateikta paviršutiniškā. Galimā kitkuo i nereikieja tikietėis, kap tėik daug plačiū temu, o po plačiū temu slepas nubuodus, sausas pėlstėms į kiaura inda. O juk temas ganietinā spalvingas.
Teisingā sāka, ka kiekybi ne visumet atitynk kokybi. Či šis puosakis poikē susitarnau. Kiekiaus knyguo netrūkst, gali anon vežti vežimās, o vuo informacijas kokybi galietu būti stiprēsni. Vėin tai, ka autorius lend į muoksla i tikiejima neturiedams ni vėina iš tū išsilavinimu, jau pasāka ka trūks informacijas giloma i kokybis.
Nuorās daug papasakuoti, bet galimybis ribuotas.
Autuorius knyguko kalb api dvi sudėtingas temas būdāms žurnalists. Aišku iš darba patirtėis iškapstyti informacija sūgeb, bet anon paaiškėn iš sāva asmenėnis patirtėis. Šituo vėituo knyga labiau tomp nebe muokslinia puobudžia, o mėgiejiška.
Iš didelia nuora išsprėsti sudėtinga rebusa gavuos tik sava nuomonis išreiškėms. Spieju tas muonis i neužkabėna, nes 344 puslapiu nuomonē išreikšti yr gan per daug. O galiausē i nelabā supratau a budizmas yr pagrįst a ne.
Knyga perskaičiau, tačiau bova sunkē i užtrukau. Gal ne laiks dā bova anā, o gal tisiuog ne muona rašyma stilius. Tiku ka budizmas su muokslu gal būti pateikti sultingiau.
Leidėjas: leidykla ,,Kitos knygos”
Leidimo metai: 2019
Puslapiai: 344
