PRANEŠĖJAS IR PREZIDENTAS

Birutė Davidonytė

Dovydas Pancerovas

Rašau apžvalga api ontra Birutis i Duovyda išleista knyga. Pāmenu, pirmuoji prymini Netflix lygiaus dokumentika, kor tyrėms prilyga aukščiausēm lygiou. O ši, untruoji knyga, primēn Bridžitos Džouns dienuorašti, tik pagrindinis veikies yr Lietuvuos Prėzidents. Bet a tai stebėn? Nemanau.

Dvi knygas dālis.

Tik pradiejus skaityti knyga, intrigoujončē įtrauki Pranešiejaus istuorija. Tai gyvenėms katruo daugelis paprastū piliečiu nesupras. Mes, eilinē piliečē, neturēm gabumu dalyvauti slaptuos operacijuos, gauti Nacionalinius apdovanuojimus už tėvynis geruovi. Bet kou esām panāšus, tai tuo, ka dūšias švaroms nepriklausa nu pareigū. Pranešies šiou atžvilgiu galietu gauti da vėina apdovanuojima už ištikimybi.

Baigus skaityti pāstaraja istuorijas posi, knyga perein pri Prezidėnta. Vo či i prasyded vėsas drāmas. Net keista skaitont matyti suaugusia vyra vaikiškus išsidirbiniejimus. Kudie anuo knygas dāli prilyginau dienuoraščiou? Nes vėsas veiksmas vykst iš už prezidentūras uždarū duru, pasikliaujont patarieju pasakuojimās api šalėis pagrindini atstuova pasauliou.

Iš vėinuos knygas galieja išeiti dvi?

Skaitont susidāra jausmas ka norietous iš šiuos vėinuos knygas padaryti dvejas ātskiras. Aprāšuomu veikieju skyrē stiprē skirās vėins nu kėta. Pėrmuoja veikieja skyrius rymts, gal kėik dramatišks, nes aukuo dėdeli dāli sāvuoja gyvenima dėl teisuos. Tai lyg didvyris, katras kovuo su neteisybi meginončia apymti šāli. Norietous daugiau i detaliau perskaityti api vėsa situacija, tačiau tai per daug slapta informacija, katruos negāl viešynti.

Ontra vėikieja skyrius pėlns vaikiška nesuaugėma, drāmas ligiuo vėituo, hipokritiškoma gyvenima situacijuos. Iš esmies, perskaičiau kitū žmoniū parašyta dienuorašti api prezidėnta gyvēnima tapus svarbiu. Tačiau skaitont nebova nuostabas, o labiau jutau turimuos nuomonis patvėrtinima. Aišku, nebučiau pykusi už pikantiškiesni siužeta, bet viel gi, tai per daug jautri tema šiou metu.

Dėl tuo tiku, ka jei būtu buvėn galima daugiau dalyntėis turimuom žiniuom, tai ši knyga būtu spauzdynta kap du atskiri egzempliuorē. Vėina rymta knyga, o kita unt komedijinia žanra i abi būtu buvėn gēras.

Kuoki jausma palėka knyga?

Nesakau ka ši knyga bluoga. Ne ne. Skaičiau su įsitraukimu, karts pasijoukdama i sunerymdama. Daug laika svarsčiau api gālias pozicijas i kudie anas gaun tėi žmuonis katrėi, kap pagalvuoji, galietu geriau negauti. Sukau gālva, kudie visuomeni renkām tus, katrėi gražē čiolb, o ne tus, kor daug nuveikėn per karjera.

Knyga iškieli nemažā klausimū i jausmū, ypač kas liet visuotini pasitikiejima. Jei mes renkām valdyti šāli žmuonis, katrėi leid sau lysti į žmoniū privatoma, tai kou begali pasitikieti šiuom dėinuom. Nežinā kėik esi saugus informaciniam pasauly, nes bet kada, tau nežinont, kitū asmenū pavedimu, gāli surynkti jautri informacija api pāti. Šiuo fākta sužinuojėms knyguo muon pasieja dideli nepasitikiejima siekla.