PENKIOS MEILĖS KALBOS

Gary Chapman

Iki pajamont knyga į ronkas, daug buvau api anon girdiejus. Aplynkinē tik gyri i siūli kou greičiau perskaityti. Periemusi pažystamu žmoniū entuziāzma susimasčiau, ka nier či kuo ilgiau laukti. I tēp nu pėrma leidėma praėja ne vėins dešimtmetis, kol aš pagaliau atsiverčiau knyga.

Kuo tikiejaus iš knygas i kon gavau?

Į knygas skaitima nieriau plačiu užsimojimu, gi tėik viskuo gēra prisiklausius buvau. Su dėdeli jiega įriaus per tas meilis kalbas i pasėikusi atramėni sėineli likau nusivylusi. Noriejuos plačiū informacijas bangų, skirtyngu problemas sprindėma pasiūlymu siubāvima, a bent švelnaus smielia skaitont žmonių pātirtis. O gavau tik pāprasta baseina, katras nesiskėr nu kitū, tokiū pačiū.

Per šion skaitima patirti turiejau pamuoka, ka nier kuo prisiimti kitū primestū lūkesčiu. Tai kas sužavieja vėinus, da nereišk ka sužavies i pāti. Šiuo knyguo meilis kālbas pateiktas kap didžiausis stebuklas, nuorynt išsauguoti santykius. Su mistiniu tuonu pasakuo, kāp tas kālbas atpažynti i suprāsti. Kor paprasčiausē užtektu atvira puokalbia.

Nejau pateikta atgyvenusi informacija?

Aišku, tās laikās, kap bova išspausdynts pėrms tirāžas, žmuonis mažiau domiejuos api emuocini sāva i aplynkiniu geruovi. Dėl tuo tiku, ka tuo metu knyga bova lyg nauja omžiaus atradėms. Kap nesikalbiejėms tomp įprastu santykiu kompanijuonu, gal tada i gelbie veiksmā a daiktā, katrėi atved i kalbiejima.

Bet šiou metu mes gyvenam XXI omžiou, informacijas api santykius i bindravima turēm tėik, ka iki kitų Kaliedu nespietumēm perskaityti viskuo. I jau žinuom, ka pagrindinis gerū santykiu rakts, motuorou neužgesynti, yr kalbiejėms i vėins kėta išgirdėms. Žinont vėins kėta puoreikius i anus gerbont, meilis kalba vykst savaimi.

Gal laiks knygā ilsietėis?

Nenuoru pasakyti, ka knyga bluoga, tačiau nier ispudynga. Gali būti, ka i pati jau esu išaugusi šiuo rašyma stiliaus batus, i nuorās gilesniū i tvirtesniū temu. Šiam gyvenima laikuotarpy turēm daug  išsamesniū knygu api santykiu puoseliejima. Aišku, jei karts esi senū pažiurū a bindravims nier tava stipriuoji posi, gal tada ši knyga i taps stebuklu. Visās kitās atvejēs, manau ka knyga jau sāva laikmeti atgyvena i laiks anā ilsietėis.