Mark Sullivan
Baisē miegstu istuorinius romanus, katrėi nūneš į praeitėis erdvi, kor visks vykst kitu ritmu, nėi esu pati įprātusi suktėis. Tai lyg laika keliavima kapsuli, katron atvertus gali persikelti kor tik šėrdis neš. Nu vėina amžiaus pri kėta, tarp įvairiū socialiniu sluoksniu i svieta veikieju. Tik pats žinuok kokē nuotaikā esi nusiteikis.
Api kon knyga?
M. Sullivan knyga ,,Paskutinis žaliuojantis slėnis“ į muona akirati patēka dėl knygu kluba, katrām reikieja anon perskaityti. Džiaugūs, ka bova pasirinkta ši knyga dėl keliū priežaščiū: ka tai istuorinis romāns i veiksmas vykst ontra pasaulinia kāra metu. Muon asmeniškā, tai vėins geresniū suderinamumu.
Veiksmas prāded vykti ontra pasaulinia kāra metu, vuokečiem besitraukont iš Ukrainas. Jauna šeima su dvijēs mažamečēs nusprėndi kartu su naciu karēs vykti į vakarus. Tik šeimynas vakarā visai kitor, nėi okupantā ketėna nugabenti kāra pabiegelius. Sumastėn su vėlku biegti nu meškuos, naujekurē turieja plāna galiausē apgauti i vėlka.
Veiksmas kap viesols?
Tik atvertus knyga, kap didžiausis skalis uragāns, veiksmas įsiorbi muni į sāva sūkuri. Vėinu metu tikrinau, a karts neskaitau veiksma trileri? Bet pateikts žanras muona nugastavima paneigi. Aišku, kap pagalvuoji, juoki keliuoni svajuonis link negāl būti be nuotykiu, o ypač kap biegi į laisvi nu meškuos i vėlka.
Struktūriškā knyga parašyta be priekaištu. Kikveins skyrius pačiuo pabaiguo užmet kablioka, už katruo kap žuvis, kaskart netikieta užkimbi. Aišku, vėins kalbiuks mažiesnis, kits būn didiesnis, priš katron jau niekāp nepavykst atsispėrti i nueiti laiku mėiguoti užvertus knyga. Į knygas gāla bova vėitu, kor net kvepouti užmiršau i akim biegau sprynta per eilutis, ka sužinuoti kou baigsēs istuorija.
Knyga patvėrtina sēna tiesa.
Apart vėsa veiksma i intrigas, knyga tik patvėrtina sēna susiformavusia nuostata api didžiaja SSRS. Kol visi teisietā pykuom unt vuokiečiu, kažkāp pamėršuom kitus kara siaubūnus, pliešusius kaimus i legalē prievartavusius mergaitis i muoteris. Teisietā įtvėrtinusius koncentrācijas stovyklas, vadyntas lagerēs. Džiaugūs, ka autuorius plačē atvieri tėkra vaizda i sukūri realu meškuos tautuos portreta.
Tep pat knyguo aiškē atsivēr vėsas kāra konteksts, kėik daug tėn nekaltū žmonių patyrusiu skausma i nuora pagaliau rāsti ramybi. Bet tuo pačiu paruoda, ka kars atver žmogaus žvėriškoma, kor krauja i žiauroma skuonis suteik eufuorija. Sužvėriejėn žmuonis vaikščiuoja laisvā, miegaujuos gyvenimu lėidami krauja i nesvarbu katrām fruontou priklausi, tėksla sėiki vėinuodā.
Kam rekomenduoju knyga?
Pati, kap istuoriniu romanu mėgieja, šion knyga rekomenduoju tokym patym. Knyguo daugiau pateikta kāra konteksta, nėi meilis scenu, kas istuorikam yr tik pliusas. Atsižvelgont į veiksma kieki, tiks i trileriu skaitytojām. Bet labiausē šion knyga siūlau tām, katras nuor praleisti gēra laika su gera knyga, i užvertus anon net neturies abejuoniu.
Leidėjas: leidykla ,,BALTO leidybos namai”
Leidimo metai: 2022
Puslapiai: 544
