Ortodoksija yr griežts nustatytu pryncipu i teiginiū laikymasis. Šiou atveju judaizma kraštutinoms, kor visks vykst pagal švėntus raštus. Muoteris daug teisiu netor nėi tikiejimi, nėi gyvenont gyvenima. Didžiausi anuos pareiga – rūpintis numās i gimdyti vakus.
Kas pasakuojama knyguo?
Knygas istuorija vykst griežtuo ortoduoksu šeimuo, kor negāli būti juokia nukrypėma. Dėl tuo pagrindėni veikieja bova unt tėik griėžtā auginama, ka net negalieja pagalvuoti api juoki kėta pasaulia įsileidėma. Tas reišk, ka negalieja skaityti pasaulietišku knygu, klausyti muzikas a žiūrieti filmus. Visa gaunama informacija tik iš švintū raštu.
Deje, auga maištynga siela, katra norieja tyrinieti pasauli i ton dari slapta, patyliukās. Bijuodama atvirā maištauti, ištekieja kap priklausa visym ortoduoksām pagal tikiejima reikalavimus. Susilaukusi vāka suprata, kad laiks atsiskėrti nu sāva tikiejima. Či prasidieja tikrasis anuos pasaulia pažinėms.
Bet lyg i kažkuo trūka pasakuojimi?
Pagal knyga yr sukorts Netflix platfuormuo serjāls. Liūdna pripažynti, bet yr labiau itraukontis, nėi knyga. Tuoks jausmas ka autuori norieja tėik daug papasakuoti, ka iš skubiejima prabiega pro pagrindinius aspektus, praleisdama smulkiāsis detalis. O juk smolkis, gylia nešinas detālis i itrauk į knyga, padarydamas anon išskirtėni i kažkuo artima su skaitytuoju.
Istuorija verta diemesia sāva uždara tikiejima atskleidimu. Visada iduomu sužinuoti slaptā laikoma informacija. Tačiau autuori ana dalinas šaltā, be jokiū emuociju. Sunku pasakyti a či pasirynkts rašyma stilius, a pasekmis mėginont išbūti su trauminiem patirtym. Ka i kāp bebūtu teksti stipre trūka gyvoma, jutėma i vidiniu apsvarstymu.
A rekomenduočiau knyga?
Kap jau miniejau, yr išleists serjals, tad rekomenduočiau labiau anon, o ne knyga. Pati iš pėrma peržiūriejau serjala, katras tikrā palėka įspudi. Dėl šiuos priežastėis paėmiau į ronkas skaityti knyga, ka gauti daugiau detaliu api istuorija. Dažniause įprasta, ka knyga pasakuo daugiau, bet šis karts kituoks. Dėl šiuos priežastėis į patarėms eiti iškart pri ekranizācijas.
Leidėjas: ,,Balto” leidybos namai
Leidimo metai: 2021
Puslapiai: 352
