Turieti emuociškā stabilius romantinius santykius yr retenybi. Ton net psichoterapiautā patvėrtėn. O visa problemas šaknis yr įaugusi mūsu šeimuo, katruo užauguom. Disfunkcinias šeimas pasitaika daug dažniau nei norietous. Vėinas yr koopriklausuomas nu svaigalū, o kėtas nu emuociškā nebrondžiū tėvū. Bet kuriou atveju mergaitis augdamas tokiuos šeimuos yr auklėjamas būti paklosnias, o tas paklusnoms ištrėn asmeninis ribas.
Kas knyguo nagriniejama?
Psichoterapiauti Robin Norvud knyguo nagrinie muoteru atvejus, kor anuos jautās sutynkončias vis ne tus partnerius. Kas kart pajaut šėltus jausmus žmuogou miegstunčiam išgerti svaiginončius gierimus, pasisliepti tarp narkuotiniu medžiagū, santykius lynkusēm sprėsti fiziniu a emuociniu smortu. Liūdniausia, ka iš netenkinončiu santykiu nerond duru pro katras sugebietu išeiti.
Kap praktika ruoda, vėsas per stiprē mylončias muoteris duru ronkenas, skėrtas išėjimou, laika sāva saujuo. Tačiau yr išmokyntas kovuoti dėl diemesia, nuora įtėkti i būti pagirta, jaustėis ka sāva gerumu gali pakeisti kentonti vyra, katron tikonti, myl visa širdim. Tik dažnu atveju anuos kovuo ne su vyru, o su tieva iliuzija katra anon užaugėna.
Knyga nedailestynga riež faktus.
Nors skaitont atruoda ka autuori rāša tiesmukiškā i be atjautuos, bet šiuo situacijuo tai geriausis pasirynkts informacijas pateikėms. Dažnu atveju surynkta informacija būn numesta be užuolonku, muoteru patirtys ver šyrdi. Tačiau, kap akis apgaub rūks, tam ka uns išsisklaidytu prireik grubaus uora sujudinėma.
Mylieti per stiprē yr liga, tuoki pati kap i alkohuolis. Psichoterapiauti net pateiki palyginimu skalis šiū dvijū priklausomybiu, anėi niekou nesiskėr. Tėi pātis bruoža susergont, tėi pātis veiksmā nuorynt pasveikti. Abi yr priklausomybis i iš abijū gāli išeiti, tačiau dėrbti su anuom reiks vėsa gyvenima, ka viel neatkrėsti paslydus.
A knyga padies pasveikti?
Visi atsakimā slyp šiuo knyguo. Perskaitis sergontis nepasveiks, bet gal bent atkreips diemesi į torima lėga. Susimastys pamatis situaciju panašoma, pagalvuos: ,,Blemba, juk vakār munėi bova panašē!”. Vėina maža pasieta siekla galvuo gāli išaugti į sprindimu priėmėma rezultāta. O nuorynt keistėis i priimti sprindimus dėl sāvis, knyga suteik vėsa informacija kap pradieti gyjėma procesa.
Jei perskaičius knyga liguos neradā – sveikinu! Yr tikrā dėl kuo pasidžiaugti. Eini tynkamu keliu.
Leidėjas: leidykla ,,Vaga”
Leidimo metai: 2022
Puslapiai: 328
