Augdama girdiedavau kalbas api masuonus i iluminačius. Paslaptis su mistika maišydavuos tarpusavy vėin tik pagalvuojus. Vėlās vakarās sėdiedavau pri interneta ėiškuodama konspiracijas teuoriju šia tema, katra keldava jauduli i nuora kou daugiau sužinuoti. Informacija bova pasisliepusi paslapčių rūki, katras skaitont daries tik painiesnis.
Tiesa daug paprastesni.
John Dickie sāva knyguo apraša masuonu istuorija nu 1717 mētu iki šiū laikū. Keliaudāms per pasaulia šalis, sūrynka vėsa galima informacija masuonu tema. Tarp puslapiu pateiki labiausē diemesi traukončius įvykius pagrindinies pasaulia šalys. Ši knyga, tarsi masuonu enciklopedija.
Pasiruoda tapti masuonu nier tep jau i sunkē. Užtenk būti vyru i laisvuoju mūrininku. Atsakyngā priiemus priesaika, katra nier jau tuoki lėgva, pasirinktuo luožie, jau esi didžiuos masuonu organizacijas dalim. Kas kelis metus yr galimybi pereiti į kėta lygi, kor gauni vis didiesni pripažinėma. Lygē sukorti bova tam, kad neužsisėdietu narē vėinuo vėituo, o mokyntous, tobulietu i sėiktu vis aukštesniū puostu.
Jei esi muoteris, tai turi du pasirinkimus: susitaikyti ka negāl muoterys būti masuoniem, arba apsimesti vyru i sėkmyngā dalyvauti veikluo. Knyguo autuorius nepraleida pruogas papasakuoti muoteru išdaigu vyru kompanijuos, katruos tikrā vertas diemesia i laika skaitont. Smagu stebieti silpnuosias lytėis stiprius ryžtus, nuoront būti ligiuom.
Masuonu kraštutinumā.
Iš pirmuos pažiūruos masuonā atruoda taikus, turyntis kėlnius tikslus, bet kap i visuos organizacijuos atsirond atšakū, katruos ne visai ein pirmykščiu taku. Knyga turiniu yr plati istuoriju spektru, nu negaliejima sustuoti jouktėis iki krauja styngdončiu baisybiu.
Dažnu atveju geri sumanimā nuein į kraštutinumus. Ispanu, italu i vuokečiu masuonā pasižymieja didžiausiu kraštutinumu. Pradiejėn nu persekiuojima nekaltū žmoniu deėja iki žudimu, kol galiausē apsisoka rats i pātis tāpa gaudyma objektu.
Skaitont sunku bova patikieti kėik gāli per laika keistėis organizacijas idieja, veikluos vizija. Iš visū mėgiamuos organizacijas per kelis metus pasikeiti į nekenčiamiausia i labiausē keikiama. Net iki šiū dėinū dar nier visiškā grįžis sunkē užtarnauts gers vards.
A knyga patėka?
Nors istuorinē faktā dažnu atveju privert muni noboudžiauti i retā įsymenu kažkon, bet ši knyga palėka daug informacijas galvelie. Paprastā, nuoseklē i intrigoujončē parašyta didžiausias i slapčiausias organizacijas pasauly istuorija.
Tiku, ka knyga patiks net tym, kas nemiegst istuorijas pamokū. Či istuorinē faktā pateikti su intrigeli, per humora a smorta prizmi. Pats pasakuojėms nier sausas, autuorius stėngās sausa informacija užrašyti kou vaizdingiau i tas anām gaunās kou puikiausē. Skaičiau įsijautus nepastebiedama kap laiks greit praėja.
Leidėjas: leidykla ,,Alma Littera”
Leidimo metai: 2022
Puslapiai: 480
