MANE VADINA SIRENA

Vaida M. Via

Žuodis distuopija šiuom dėinuom ypač aktualus. Kap mes mislijām, ka jau esām su technoluogijuom i sāva gyvenimās pasėikėm maximuma, atsirond kažkas dā naujiesnia i mes vis labiau stumamies link prarajuos, po katruos viel grįšem į nulini tāška. Ši knyga paruoda kāp stiprē mūsu perteklius gali mums patym pakėšti kuoja.

Debiuts katras sužavieja?

Debiutoujonti lietuviu autuori paruodi sāva kūryba dėinuos švėisā. Tai pėrma distuopinis triluogijas dalis, kor išgalvuots pasaulis atskleid moralis kaina, gāliu pozicijas i tyra troškėma būti laimyngām, nors visks aplynkou sukorta žmogaus laisvis naikinimou. Net didžiausi pinigā karts nesuteik laisvis suvaržytam pasauly.

Skaičiau naujē išleista istuorija i mačiau gālima scenariju realybie, katras gali ne už kalnū pasikeisti. Nors šis sukorts pasaulis muonis i nenustebina, tačiau naujuos rašytuojas minčiū pateikėms i siužeta vingiu išdėliuojėms stiprē sužavieja. Išpėldyti veikieju charakterē, nuoseklē su intriga išlaikuoms veiksmas įtrauki kap cunamis, nusinešdāms viskon į vundinyna.

Kuokis temas vyrau knyguo?

Romana meilis istuorija įtėmta, leidonti skaitytojou įsijausti i pasijosti serjāla žiūruovu. Kikvėins skyrius atver vis daugiau detāliu, po katrū tikys meilis su laimynga pabaiga, nes jau nu pirmū knygas puslapiu tampi pagrindiniu veikieju sirgalius. Veikieje su sava gyvenima istuorija, vidines jausmas i minčiū srautu paverg vėsa diemesi i nuora anus vis labiau pažynti. Tačiau be meilis linijas, knyga tor da ne vėina gēra tema.

Skaitont knyga šalimās meilis istuorijas ein stipri politikas linija. Tai nauja era, katruo atsironds patriarchats nustūmis muoteris į šuona i sau leidis anas suskėrstyti į kelis rūšis pagal prigimtėni padermi. Naus gyvenėms, kor piniga ėm vėršu i nulem geresnis teisi. Tačiau a tikra piniga tokėi galyngi? Knygas pabaiga tor atsakyma į šion klausima.

Kuoki vaizdoujama žmogaus prigymtis?

Vertont puslapius leidau sau anūs visiška pasiklysti. Laikont knyga ronkuos užmiršau aplynkini pasauli i gyvenau sukurtam, stebiedama žmogaus prigymti. Karts nustebdavau, nesuprasdavau tam tikrū pasirinkimu a sprindimu būdu, bet dažniause tik pasitvėrtindavau jau sene suformouta nuomoni. Mes visi esam skirtyngi i vis kitep prisitaikuom pri naujū gyvenima aplinkybiu. Tačiau visi vėinuoda nenuoram prarasti sava, kap žmogaus, tapatybis, nes anuos neblėkus nebelėikt i pačia žmogaus.

Kol esam nepraradėn žmogiškoma, mums meili yr galingiausis žmogaus jausmas, priš anon pruots bejiegis, o istatėms ne visagalis. Patyrus tėkra jausma dingst baimi rizikouti, įsijūng kovuos inkstynkts dėl truokštama žmogaus šilumuos, net jei tai i uždrausta. Tačiau visks šiam gyvenimi tor kaina, o karts ta kaina daug didesni nėi išgali sumokieti. Priimti sprindima gal skaudynti iki sielas esybis, net jei žina, ka anėi priimti nuorynt gera i stėngontėis išgelbieti artima siela. Per visus šius išmėginimus knygas veikies praėja sāva kailiu.

Kuoki yr žmogaus kalba, katra keit įsitikinimus?

Kurinys plače atskleid žmogaus moralinius kuompasus. Mūsu rūšis yr prisitaikonti ka išgyventu, dėl tuo sugedabam nueiti į kraštutinumus kor karaliau piniga i galia. Istuorijuo tai bova pagrindėni valiuta, katra nupėrkdava daugeli istatymu, žmoniū įsitikinimus, pagalba i net vyltis su svajuoniem. Pasauly kor kalbama pinigū kalba, lėikt maža nuoširdoma i tikroma, moraline įsitikinima kynt su derašomās nulēs pri pėrma skaičiaus.

Net labiausē supuvusiuos sistemuos pasitaika tū, katrėi sūgeb išlėkti vos arba išvis nepaliesti. Pagrindinē veikiejē stiprē stėngies išlėkti nuošaly purvinuos i nepagristuos sistemas, tačiau ne visuos situacijuos anym pavyka. Knygas puslapē aiške atvieri žmogaus prigymtis, troškimus i puolinkius į katrus kasdėinybie ne tēp dažnā atkreipām diemesi. O dažnu atveju net skaudu bun išvysti slegončia tiesa i pagrindėni kalba, katra žmuonis nuor kalbieti.

Išvada api knyga.

Knyga muni stiprē palieti, nes kap sakiau pasinieriau visa į anon. Nors puslapiu anuo tikrā netrūkst, bet noriejau da daugiau. Autuori pilnā iki maximuma išpėldi veikieju charakterius, katrėi nestuoja stebynti iki pat paskutinia puslapia. Kikvėinam skyriou vis kažkon nauja atskleid, kas tik dā labiau suartėn su istuorijas heruojēs.

Veiksma linija išlaikyta įtraukonti iki pat gāla. Patėka pasirinkėms skyrius užbaigti su intriga, katra neleid užversti knygas i eiti golti, bet sužadėn smalsoma gijas i ragėn keliauti į nauja skyriu. Kap geriausiam serjali, negali baigti žiūrieti, nes turi sužinuoti kap baigses esama situacija.

Paskutinis skyrius paveiki muni stipriausē. Užvertusi knyga da kelis minutis sėdiejau žiūriedama i knygas viršieli su pravira borna i pasimetusēs jausmās. Pajutau kuoki trapi yr pasirinkimu gija. Bet šis jausmas paruodi kuoki stipri ši knyga i kėik daug emuociju i išgyvenimu anuo telp.