Didžiuoji dalis Itin Jautriū Asmenū (IJA), yr įpratėn plakti savi už tai kokei yr. Megėn pakeisti visus sāva bruožus: kūna, myntis, elgesi, puomėgius iš pat pagrindū. Rets katras suvuok, ka būvėms jautriu ne visada yr kančia. Tai gāl būti duovana, katra pasitarnau kikvėina dėina būnont geru žmuogum.
Kou dalinās autuori?
Elaine N. Aron sāva knyguo smolke apraša IJA gyvenima su katrou susidor tik gėmus i pramerkus akis. Itin jautrus asmenys tokēs gyms, o ne įgaun jautroma per auklėjima. Aišku, auklijėms prisyded pri šiuos savybis atvėtėma arba užgožėma. Kap gali vykti pastarėjē du procesā, autuori apraša knyguko su pavyzdžēs.
Profesuori, psichoterapiauti dalinās tyrimās darytās IJA labiau ištėrti i suprāsti. Nors šėi tyrimā yra gan nauji i ne pilnā išanalizuoti, bei patikrynti, tačiau geresnēm pažinimou jau vaizds susikor. Pasiruoda šiū žmoniū smēgenis dėrb kitēp, nėi nejautriū. IJA emuociju laukā efektyvesni, kas nulēm itin dėdeli smegenų stimuliacija per jausmus. Fiziniu jėgū paskėrstėms tep pat skirās, nes pruots fiksou viskon aplynkou nesustuodams, kas dėinuos eiguo išsekėn kūna.
Kam reik perskaityti šion knyga?
Tai lyg enciklopedija, katron tor perskaityti kikvėins jautrus asmou i žmuonis būnontis šalimās anū. Aplynkinē žmuonis jautrym tor daug įtakas, ypač besifomoujont IJA asmenybē. Autuori pabriež, ka turynt žiniū api itin jautrius asmenis, galēm anym padieti jaukiau i maloniau jaustėis šiam pasauly.
O pačiam IJA ši knyga padies labiau suprasti sāva minčių i kūna elgesi. Suvuokus iš kor atein nerima priepuolē, išsekis kūns po dėinuos darbū a baimi išeiti i viešuma, galies pradieti mėgynti naujus elgesia muodelius, katrėi leis laisviau korti naujus ryšius su žmoniem sāvis nesekinont. Jei pats jautrus žmuogus pradies savi sauguoti i gerbti torima savybi, tai i aplynka pradies elgtėis panašē.
Kou ši knyga munėi ypatinga?
Aš pati esonti IJA.
Visumet mislyjau, ka tuoki tapau dėl auklėjima. Žūt būt mėginau visuom išgaliem keisti i užguošti jautru elgesi. Biegau nu jautroma kap velnias nu švėntynta vundēns. Tačiau per sāvis pažinėma i priėmėma suvokiau, ka jautrioms yr duovana, katron ne visi atsineš gymdami. Tik 5-20proc. populiacijas tor IJA savybi.
Nemelousu, šion knyga turiejau paimti į ronkas daug unkščiau, kap i dauguma IJA. Su ana pradiejau stebieti sāva reakcijas, nestumti dā labiau į perdegima i korti naujus elgesia muodelius. Perskaičius knyga supratau, ka būti jautriam nier prakeiksmas. Tiku, ka visi IJA, katrėi perskaitys šion knyga tep pat lingviau atsikvieps.
Leidėjas: leidykla ,,Sofoklis”
Leidimo metai: 2022
Puslapiai: 352
