Patėrtas traumas niekor nedyngst iš mūsu kūna. Mes galēm i turēm anas gydyti, bet ronds liks, i jokėi kremukā anū nepanaikyns. Negyduoma trauma gali įsišaknyti kap piktžuoli, katra vis per nauja mietys sieklas i daigyns naujas piktžuolis aplink savi tol, kol kvepouti bus neįmanuoma.
Pirmaplāni knygas veikieja trauma.
Hanya Yanahara knyguo pagrindiniām veikiejou Džudou suteik vėina iš rimčiausiu traumu – seksualini prievarta. Ka maža nebūtu, dā pabarsta unt vėršaus i fizini sužaluojima, katras nepaleid ištisus gyvenima metus.
Jauns vaikinuks su psicholuogini i fizini trauma tvarkuos ne pas specialistu, o voniuo su skustova aštria briauna. Gilindāms rundū vagas sau nepāded ni kėik, nes naujasis puomėgis nesibičiuliaun su sena fizine trauma. Visas gyvenima ,,duovanas“ sumetus į vėina kātila, galēm stebieti, kap žmuogus vis gilie į destruktyvoma ne sāva nuoru.
Tolimiesnis siužets.
Nors pagrindiniam plani aprašuoma trauma tuoki dėleli, ka net nejauku lyginti su kituom, ontraplanē veikiejē atskleid kitas, įvairis i dažnā aplinkuo patiriamas traumas: nepripažinėms, nuvertinėms, atstumėms, nepritapėms. Či galiu vardynti be sustojėma, knyga plati anū pasirinkimu.
Per istuorijas pasakuojima, gan tikslē paruodomi keli traumu valdyma mechanizmā. Vėini ein per darba su savim, stėngdamiesi išeiti pasveikėn, bet būn, ka po traumu žmuogus nuein į visiška kraštutinōma. Tėn atsidūris pagrindinis veikies nesugebieja valdyti sāva ydu, tapa destruktyvus i savi naikinontis.
Pasakuojėms atvēr tėkra gyvenima po traumu.
Gyvenimā nier tuoboli, nors nuorās anus tuokius pateikti. Veikieję poikē paruoda, kap sunku atverti sáva sužaluota vėdu. Daug lingviau apsimēsti laimyngās, susitvarkiusēs su problemuom, i tep išvėngti aplinkuos klausimų a išunkstiniu nusistatymu.
Stebont pagrindini veikieja, matuos kap per vėsa knygas veiksma uns vėng kalbieti api ton, kas anam įvyka. Daugeliu atveju patogiau vaidynti laiminga gyvenima, nei matyti aplinkiniu gailesti, nesupratėma, megėnima padieti nežinont kāp. Dėl tuo daugelis aukū tyl, nes pasirenk, anū manimu, saugiesni kēlia.
Knyguo gali rasti daleli sāvis.
Manau knyga šokirous tus, kas nier stiprē prisilietėn pri šalta dogna. Bet tėi, kam tēka pabūti tumsuo, turietu kuriny rasti daleli sāva išgyvenima. Aš anon radau, kas muon padieja neteisti veikiejaus elgesia, o su jautrumu išgyvenau anuo pasirinkimus.
Leidėjas: leidykla ,,Baltos lankos”
Leidimo metai: 2023
Puslapiai: 672
