DEMONAI, KURIE MANE SAUGO

Jolanta Waldner

Ezoterinis pasaulis pėlns paslapčiū i neįruodytu muokslu tiesū. Nors mes, dažniausē, viešā sakuom netikyntis tou, bet vidou miegaujamies istuorijuom api slāpta į nepatvėtynta pasauli. Kap i ši knyga, pasakuojonti api angelus i demonus, mus įtrauk į pasauli, katruo realiam gyvenimi negalietumiem patėrti, bet slapčia vilamies, ka pāsaka persikeltu į realybi.

Ar knyga skėrta paaugliams?

Jolantas Waldner knyga yr priskėrta paaugliū žanrou, kor istuorija sukās api kon tik pilnametystis sulaukusia jauna muoteri i žavius anuos angelus. Istuorija apipynta mistiniu pasakuojimu i nelengvu gyvenima likimu. Jauns žmuogus per vėinerius metus tor patėrti tėik puokyčiu, kėik kiti net per pėnkmeti neižgyvēn. Tačiau nu likėma nepabiegsi, uns bet kuokiu atveju viskon sudies į sāva viežias.

Knyga skėrta paaugliams, tačiau aš, kap suaugusi asmenybi, skaitont mačiau kitus svarbius muomentus. Tai, ka knyga priskėrta vėinām žanrou a amžiaus grupē, nereišk ka tik tuos grupis i tegāl skaityti. Skaitydama ne sāva omžiou skėrta knyga aš prapletu akis į šiuolaikini paaugliū gyvenima, pamatau kou gyvēn i kou duomās, per anū pasaulia mātima ižvelgu reikiamas naudas.

I kon pirmiausē knyguo atkreipiau diemesi?

Turu įtarėma , ka ne veltou ši knyga pasėiki muni. Pati nebūčiau anuos sugalvuojusi skaityti, jou labiau, ka tai paaugliam skėrts žānras. Tačiau šiou metu esu stiprē apsupta ezoterikas, stėngous anon įsileisti į vėdu. Sutapėms a ne, či jau likimou sprėsti, bet su šia knyga i muona ronkas patēka angelū tema. Tai nemelousu, jog labiausē į ton i susifokusavau, nes per angelū vaidmeni galiejau pamatyti gylesni knygas vaizda.

Angelā i demonā – tai visātas balānsas tarp bluogia i gieria. Či tvyruo trapi linija, kor per minkiausia klaida gali pereiti iš vėinuos posis į kėta. Nors mūsų tikiejėms skleid stėpria nusidėjėma kaina, muon patėka, ka knyguo ne kārta paruodi, jog visks yr atleidžiama i ištaisuoma, jei tikrā nuorēs pasitaisyti. Nusidėjėms nier pasaulia pabaiga, jei širdy truokšti išpėrkti padaryta skriauda.  

Kuoki svarbi žinuti perdoud istuorija?

Kita graži knygas tema – likėms. Mes visi turēm sāva likėma, net angelā i demonā, kap jau knyga atskleidi. Aišku, tai fantāstini knyga, bet i fantastikuo būn daug tiesuos, katra likėma pagalba atkeliau iki mūsų, ka išgėrstumēm reikiama informacija. Kap i knygas pagrindėni veikieja, daugeli užslieptū atsakymu ėiškuoja pasitelkusi knygas i piešinius tam, ka pagaliau sužinuotu kas anā lėmta išsiaiškinti.

Autuori knygas istuorija pasakuoji vis pasitelkus likėma samprata. Kas kart per veikieju išgyvenimus, skaitytojou primyndama, ka mes visi turēm sau skėrta likėma. Nesvarbu, jei mes anām priešinsimiems tėik stiprē, kap vėins iš knygas veikieju angelū, a priimsem anon, kap pagrindėni veikieja Alexandra, uns vistėik mumis pasėiks. Mes bet kuokiu atveju atsidorsēm sāva viežiuos i ton tiesa autuori jautrē atskleidi knygas pabaiguo.

Išvada api knyga.

Knyga skaičiau pasimiegaudama kikvėinu puslapiu, ne vėin dėl gražaus ezoterinia pasaulia apipavidalinima. Pati knygas istuorija bova įtraukonti, su ne vėina paslaptim i kabliukās, katrėi užsikabėn už skaitytuojaus i vert norieti žinuoti daugiau. Pasidavus knygas įtraukimou, miegavaus sklondžiu veikieju charakteriu atskleidimu. Autuori išlaiki pagėrtina tėmpa, kor kikvėins veikies po biški vis atsivėrinieja skyriūs, sudiedami bėndra sāva asmenybis puzli.

Perskaityta istuorija verta ne tik paaugliū diemesia, bet i suaugusiu. Tiku, ka skirtingas kārtas skirtingā supras knyga, bet či i slyp vėsas žavoms. Autuori šiuo knyguo padāri dideli darba išlaikydama balansa tarp fantastikas i realaus pasaulia, kor sujungus abu gavuos įtraukonti i tikiejima pripėldonti istuorija.