Kėik dažnā jautys vidou savim nepasitikontis? Plaki minčiū lėižuviu už ne ton pasakyta žuodi, netėkusi elgesi, už priimta a išsigosta sprendėma. Kas kart keiki visāta, kad dāvi ne ton kūna, nes jei geriau atruodytum, būtum ,,kėitiesnis“. Sau pasauly atruodā didžiausis nevykelis, liūrbiu liūrbis, katras tesūgeb užsikāsti pribezdietuo patalynie.
Spieju pataikiau į ne vėina dūši su numestās teiginēs. Mes visi esam žmuonis i visi panašē sugebām savi nuvertinti, slieptėis už dalyku api katrus rāša Benas sāva knyguo.
Knygas personažā.
Beno Lastausko knygas personažā visi iš pažiūruos skirtyngi, bet giliau pakapsčius rondi daugiau panašumu, nėi galiejē tikietėis. Mes visi žinuom ton ofisini biča, katras dėinas leid korporacijuo, o vākarus pub‘ūs. Maruoza iš rajuoninia daugiabučia, kor nikāp nesūgeb susirāsti darba, nes visi per prasti. Ne kārta susitikuom su kaimietuke didmiesty, katra atvažiāva studijuoti i sėikti karjeras, nes kaima gyvenėms ne anai. Tarp pažystamu tikra žinuom ne vėina šeimuos užguita mergina, katra bėja pati sāva minčiū, per ėlga laika tėvū numušts pasitikiejėms savim griaun asmenini gyvenima.
Išskirtinis rāšyma stilius.
Pėrmus puslapius skaityti šnekamāja kalba nebova lėgva. Nors socialinē tinklā jau pripratina pri šnekajūmu tekstu, bet knygā tas dar nebova įprasta. Kadangi nuojuovis miegstu, tai nu trečia skyriaus jau pripratau i atruoda lyg či bovis vartuojāms necenzūrinis žarguons i rāšyma stilius.
Susidraugāvusi su rašyma stiliu, perėjau pri knygas mintėis.
Skirtyngi išgyvēnima mechanizmā.
Skaitont vėsa susipynusia istuorija, diemesi atkreipiau į kikvėina veikieja mechanizma išgyvenont traumu pasekmis. Veini stėngās anas nupėlti alkohuoliu, katras vākara eiguo užpylis akis atjūng smēgenis. Tik gaila ryti viel vėsas problemas grįžt. Kiti bieg per narkuotikus, maišydami anus su alko, bet nesuvuok, ka tai laikėns pabėgėms. Treti per ,,kėita” bazāra, numenkindami šalimas esonti i iškeldami sāva ego, nes be anuo aukštinima daugiau nieka nesūgeb. Likėn per megėnima įtėkti aplynkinem i bijuodami atvirā kalbieti, nes geriau savi pamynti, nėi tapti nepatogē.
Tiesa, veikiejē pateikti per kraštutinoma, į katron realybie gal ne visi nuein. Bet tiku, ka ne vėins tėn yr bovis. Praktikuo būn tep, ka vėini išein iš gyvenima kraštutinumu, o kiti, deje, lėikt anūs su visām. Knyguo ši vėita aiškē pavaizduota per skirtingus veikiejus, kol vėini stėngas išlėpti iš šūda, kiti tik dā giliau į anon brend neužouzdami kvāpa.
Tuos pačias problemas visās dešymtmetēs.
Šiuolaikėnis žmogaus problemas visās omžēs bova tuos pāčias. Mes išgyvenām ton pāti nepasitikiejima, nuvertinima, diskrimināvima, kap knyguo aprašuomi žmuonis. Slepām sāva demonus per kitū menkinima, nesiskaityma, įžeidiniejima i kasdėinini ego gluostyma. Galem ton neigti i nepripažynti, apsimēsti geresnēs už kitus. Bet skaitont knyga visteik užkabini matyta a jausta akimirka.
Manau knyga patiks tym, kas nebėja sau atvirā pripažynti jog vidou bova, o gal i yr biški šūdžē. Mes nesām aukščiau kitū, o tisiuog tep pat meginām išgyventi kap i knygas veikiejē. Tep, kap suprontām i sugebām geriausē. Visokiū gyvenimū yr i nereik stebietėis, ka kiti gyven kitep nėi tu pats.
Leidėjas: leidykla ,,Laisvės media group”
Leidimo metai: 2024
Puslapiai: 240
