Albert Camus ,,Svetimas”

Nesumelousu sakydama, ka visi esām kažkuriam gyvenima etapi pasijutėn svetimi aplinkā, šalimās esamym žmonym, o gal net i pačiam gyvenimou. Nerasdami bindruos kalbuos su sāva mintim, klausiniejām klausimū i katrus bijuom surāsti atsakymus. O skaudžiausi būti pasidāra tumet, kap net pats sau tompi svetėms.

Egzistencializma filosuofija.

Žymus egzistencializma filuosofs Albert Camus knyguo atvirā kalb api svetimoma jausma gyvenimou. Iškel klausimus, katrėi vert susimastyti api sāva būvi, likėma atneštus išbandymus. Nejaugi mes visi atsidurām nulimtu vėituo, nulėmtu laiku? Pasitelkis mirtėis atspalvi, rašytuos nuklyst į vidinius žmogaus kluodus, katrūs slepās paslaptingiausias tiesas.

Pasiruoda mirtėis akimirkuo visi klausimā pagaliau įgaun atsakymus. Nebelėkus kon prarāsti, žmuogus sugeb sau būti nuogā atvėrs. Albert Camus šiam sāva kuriny žmogaus atviroma paruoda per pykti, katras susimaišis su baimi, i či nu anuos nebier kor biegti.

Knygas istuorijas linija.

Autuorius sāva įžvalguom atskleid jaunuolia apātija gyvenimou, anuo slinkėma kasdėinuo be aiškaus tėksla. Sunkiausi gyvenima praradimā anuo daugiau nebejaudėn, sėikti karjeras tikslū nebeketėn, o aplynk supontis žmuonis prasmies nebeteik. Neėiškuodams pažinčių prijam visus, kor nereik įdieti jėgū buvimi. Iš pėrma atruoda, ka veikies tisiuog nevertėn tuo, kon anām pateik gyvenėms. Tačiau tiesa slyp giliau – uns bova svetėms.

Kap pats vidou žmuogus jautās svetėms šiam pasauliou, likėms sudėliuo galimybi iš anuo išeiti. Tep sukrent kuortas, ka ni stėngtėis nereik išgaunont rezultata. Knygas veikies sāva likėma priiemi ramē. Nors skaitont kėlst daug klausimū, bet veikies nėi karta nepaklausi siužeti, už kon anam tep susikluosti. Pasinauduojis suteikta galimybi pėrma i paskutini karta, per baimi, pripažėna svetimoma, katras ėlgus metus tūnuoja anam.

Kuoki knygas spalva?

Knyga liūdna i niuri, mažā kou nudžiuginonti skaitytuoja. Sāva vidiniu juodumu nudāža veiksma šaltu atspalviu. Nors autuorius stėngās paruodyti gamtuos šėltus atspalvius, bet veiksmas užpaiša viskon sāva tomsa. Išgyvenus spalvas i pažvelgus giliau, pamatā kuoki knyga turtynga filosuofinēs pamastimās. Kėik anuo įžvalgu į žmogaus ne tik išorini, bet i vidini gyvenima.