ACHILO GIESMĖ – knyga likimo giesmei?

Madeline Miller

Žmuogus nuor būti didžiu, gerbiamu i visū nešiuojamu unt ronku. Vidou slypintis ego vis šauk i prāša būti patenkynts, tačiau anuo riksmūs retā susimastuom, kuoki yr šlovies kaina. Dažnu atveju nuorās gauti, o api mokiejima vis nuvejam myntis. Tačiau likėms nepamėršt kon doud i kėik tor atsiimti, klausėms a žmuogus su tou susitaikys i galies gyventi toliu.

Ar egzistuoja likimo nulemta meilė?

Pasakuojamas istuorijas cėntri dominou Graiku pusdievis Achilas i anuo draugs Patroklas. Berniuku draugysti prasidieja dā vaikystie i užsytesi iki pat branduos, kor tapėn vyras į pasauli žiūrieja jau subrėndusiuom akym. Nu pat mažēns bova neišskiriami, mokinuos kārtu, leida laisvalaiki i nuolat samprotāva api pasauli kokiam norietu gyventi.

Tačiau anū draugysti bova intymi, švelni i prieraišumu persipynusi meili. Tai ne du draugā augėn kartu, tai partnerē, katrėi be vėins kėta negalieja gyventi. Ši meili bova visuoki, pačiuo pradžiuo nekālta, tyra lyg kalnū vundou, be katruo atruoda negalieja gyventi. Vėliau ši meili tāpa gili, pasiaukuojonti i neatskirama nu skausma. Vyru jausmā bova lyg varomuoji galia, suteikonti gyvenimou prāsmi. Skaitont sunku neįsijausti į anū draugysti, nematyti kėik jausmā kitām žmuogou gali būti stėprus, kor nebelėikt savanaudiškoma.

Likimas ar laisva valia?

Patroklas mylieja Achila iki širdėis gilumuos, anuo meili nesuvaidynta i nesavanaudiška. Sužinuojis mylimuoja lėmti – šlovie, uns pasirynka buti šalimās, net jei užmuokestis už šluovi bova unstyva Achila mėrtis. Neprāši i nemaldāva partneriaus pasilėkti saugē tėvynie, nes žinuoja, ka uns už viskon labiau nuor pripažinėma i būti nešiuojāms žmoniū unt ronku. Vėituo peršnekiejima pasirynka buvėma šalimās i palaikyma, ka i kėik likėms bebūtu dāvis laika.

Autuori per berniuku dialuogus, anū myntis, gvildēn tema katruo aiškē atsivēr žmuogišks nuors rynktėis net tada, kap pasirinkėms jau nulėmts i pasmērkts. Nors veins iš veikieju jau laisva valia pasirynka eiti kartu meilis vedėns, kits vis svārsta sāva pasirinkėma, katram paaukuos dėdeli duokli. Atruoda Dievā jau išpranašavėn likėma i lėmti, bet vis kėrb Achilou ton pranašysti paversti laisva valia, kor ein į kāra vedėns ne aukštesniū galiu, o atviru nuora pripažinimou – tāpti tautuos didvyriu.

Kokia herojaus kaina?

Abodu berniukā pasirynkėn vykti į kāra jau žinuoja kuoki bus šlovies kaina. Tačiau nenutuoki, ka myrtis ne vienynteli kaina katron anėi sumokies per daugeli kariavima mētu. Svetimuo šaly spieja abodu suaugti, iš berniuku tāpa vyrās, katrėi patyri emuocinius suvokimus api gyvenima i vėins kėta. Su kikvėina žudyniu i kunkinimu dėina, anėi aukuoja dalēli savū įsitikinimu, kas kart turieja nuryti skaudžias tiesas vardan išaukštinėma. Išaušdava dėinas, kap reikiedava pamynti išdidoma i net išdoudi vėins kėta, vardan geriesnia sprindėma. Truojas kārs pareikalāva atidouti ne tik givybi, bet i pamynti savus pryncipus.

Knyga nuplieši heruojaus mita, paruodydama kas slepas po kikvėinu pasirinkimu. Žmuogus, bovis iš prigimtėis jautrus i pažeidžiāms, pasirinkėma metu tor savi išdouti tapdāms žiauriu i negailestyngu. Per ton perėja abu veikiejē, skaudē sumokiedami kaina už varda, katras tāpa legėnda. Šiami kari abodu patyri daug daugiau pralaimiejimu, nėi laimiejimu, o visa tai bova jau Dievū nulėmta i meili čia bova draugi, katra ne visada padiedava.

Išvada.

,,Achilo giesmė“ yr muona ontra autuoris skaityta knyga, katra nenusileid pirmā. Nu pat pradžiū įsitraukiau į pasakuojima išjausdama vėsa jausmū spektra. Karts sunku patikieti, ka knyguo gāli slieptėis tėik daug puojučiu, katrėi rond kelia į šyrdi. Autuori neskubont išpėldi veiksma linija, vaizdžē nupasakuodama įvykius, o veikiejus jautrē lydieja per išgyvenimus. Vėsas pasakuojėms yr gyvs i neapsūnkinontis skaityma.

Skaitont dažnā stabteliedavau susimasčiusi kāp pati elgčiaus esamuos situacijuos. Būčiau labiau Achilu, o gal Patroklu? Abu veikiejē ka i jautrus iš prigimtėis, tačiau gyvenima gludinami išauga skirtyngi. Keliaujont puslapēs mėgyndavau įšuokti į veikieju batus, kor tikrinaus savi i numanomus pasirinkimus. Knyga iššauk ne vėina gėlia tema, katra leid apsvarstyti turimas vertybis.